ശരീഅത്തിനെ ഇകഴ്ത്തുന്ന ചര്‍ച്ചകളില്‍ നിന്ന് വിട്ടുനില്‍ക്കണം:ജംഇയ്യത്തുല്‍ മുദരിസീന്‍

കോഴിക്കോട്: ശരീഅത്തിനെ ഭംഗം വരുത്തുന്ന ചര്‍ച്ചകളില്‍ നിന്നും വിശ്വാസികള്‍ വിട്ടുനില്‍ക്കണമെന്ന് സമസ്ത കേരള ജംഇയ്യത്തുല്‍ മുദരിസീന്‍ സ്റ്റേറ്റ് കമ്മിറ്റി പ്രമേയത്തിലൂടെ ആവശ്യപ്പെട്ടു. ജംഇയ്യത്തുല്‍ മുദരിസീന്‍ വര്‍ക്കിംഗ് പ്രസിഡണ്ട് സയ്യിദ് മുഹമ്മദ് കോയ ജമലുല്ലൈലി തങ്ങള്‍ അദ്ധ്യക്ഷത വഹിച്ചു. മസ്ജിദ് കേന്ദ്രീകരിച്ചുള്ള പഠനം പള്ളി ദര്‍സുകളിലൂടെ പ്രാവര്‍ത്തികമാക്കാന്‍ മഹല്ല് കമ്മിറ്റികളും, സമസ്തയുടെ പോഷക സംഘടനകളും രംഗത്തിറങ്ങണമെന്നും യോഗം ആഹ്വാനം ചെയ്തു. പട്ടിക്കാട് ജാമിഅ സമ്മേളനത്തോടനുബന്ധിച്ച് മുദരിസുമാരുടെ സംസ്ഥാനതല സമ്മേളനം വിളിച്ചു കൂട്ടാനും തീരുമാനിച്ചു.

സെക്രട്ടറി എ.പി. അബ്ദുറഹിമാന്‍ മുസ്‌ല്യാര്‍, ജോയിന്റ് സെക്രട്ടറി മൊയ്തീന്‍കുട്ടി വൈസി വാകക്കോട്, മാണിയൂര്‍ അഹമ്മദ് മുസ്‌ല്യാര്‍, ശംസുദ്ദീന്‍ മുസ്‌ല്യാര്‍ കാസര്‍ഗോഡ്, ഹംസ മുസ്‌ല്യാര്‍ വയനാട്, അബ്ദുല്‍ ബാരി മുസ്‌ല്യാര്‍, ആര്‍.വി.കുട്ടിഹസന്‍ ദാരിമി, കെ.സി.മുഹമ്മദ് ഫൈസി, എം.പി.തഖിയ്യുദ്ദീന്‍ ഹൈതമി കോഴിക്കോട്, അസ്ഹറലി ഫൈസി, മൊയ്തീന്‍ ഫൈസി പുത്തനഴി, കെ.സി.മുഹമ്മദ് ബാഖവി മലപ്പുറം, അബ്ദുറഹ്മാന്‍ ഹൈതമി - ബ്ലാത്തൂര്‍ കണ്ണൂര്‍, അബ്ദുല്‍ ലത്തീഫ് ഹൈതമി പാലക്കാട്, ഉസ്മാന്‍ ഫൈസി ദക്ഷിണ കന്നട, തുടങ്ങിയവര്‍ സംസാരിച്ചു.